സുബൈര്‍ മുഹമ്മദിന് കണ്ണീരില്‍ കുതിര്‍ന്ന യാത്രാമൊഴി

കോഴിക്കോട്: സ്‌കൂള്‍ ബസിടിച്ച് മരിച്ച സുബൈര്‍ മുഹമ്മദിന് (16) കണ്ണീരില്‍ കുതിര്‍ന്ന യാത്രാമൊഴി. മര്‍കസ് സീനിയര്‍ സെക്കന്‍ഡറി സ്‌കൂള്‍ പത്താംതരം വിദ്യാര്‍ഥിയായ പുതുപ്പാടി കൈതപ്പൊയില്‍ വള്ളിയാട്ട് കാരാട്ട്‌പൊയില്‍ സുബൈര്‍ മുഹമ്മദിന്റെ മയ്യത്ത് വന്‍ ജനാവലിയുടെ സാന്നിധ്യത്തില്‍ വള്ള്യോട് ജുമാ മസ്ജിദ് അങ്കണത്തില്‍ ഖബറടക്കി. ശനിയാഴ്ച ഉച്ചക്ക് മന്ത്രി തിരുവഞ്ചൂര്‍ രാധാകൃഷ്ണനു നല്‍കിയ സ്വീകരണച്ചടങ്ങില്‍ അവസാനമായി സ്റ്റുഡന്റ് കാഡറ്റായ സുബൈര്‍ സല്യൂട്ട് നല്‍കിയ സഥലത്തുതന്നെ വിദ്യാര്‍ഥിയുടെ ചേതനയറ്റ ശരീരം കണ്ടപ്പോള്‍ വിതുമ്പലടക്കാനാവാതെ സഹപാഠികള്‍ യാത്രാമൊഴി നേര്‍ന്നു. മര്‍കസ് സ്ഥാപനത്തിലെ വിദ്യാര്‍ഥികളും ഉസ്താദുമാരും സുന്നി പ്രവര്‍ത്തകരും ജില്ലാ പോലീസ് കാഡറ്റുകളും ഉയര്‍ന്ന പോലീസുദ്യോഗസ്ഥന്മാരും സുബൈറിന് വിട നല്‍കി. മര്‍കസ് മെയിന്‍ ഓഡിറ്റോറിയത്തില്‍ നടന്ന മയ്യത്ത് നിസ്‌കാരത്തിന് ജനറല്‍ മാനേജര്‍ സി മുഹമ്മദ് ഫൈസി നേതൃത്വം നല്‍കി. കാന്തപുരം എ പി അബൂബക്കര്‍ മുസ്ലിയാര്‍ ആമുഖ പ്രഭാഷണം നടത്തി. ഉച്ചക്ക് രണ്ടര മണിയോടെ വള്ളിയാട് ജുമാ മസ്ജിദില്‍ നടന്ന മയ്യത്ത് നിസ്‌കാരത്തിന് കാന്തപുരം എ പി അബൂബക്കര്‍ മുസ്ലിയാര്‍ നേതൃത്വം നല്‍കി. മൂന്നുമണിയോടെ വന്‍ ജനാവലിയുടെ സാന്നിധ്യത്തില്‍ മയ്യത്ത് ഖബറടക്കി. നാട്ടിലെ പൊതുരംഗങ്ങളില്‍ സജീവമായി സുബൈര്‍ കൈതപ്പൊയില്‍ യൂനിറ്റ് എസ് എസ് എഫ് ജനറല്‍ സെക്രട്ടറിയും വള്ളിയാട് യൂനിറ്റ് കള്‍ച്ചറല്‍ കൗണ്‍സില്‍ സെക്രട്ടറിയുമായിരുന്നു.